Occitània es lo
país del sud-oèst d'Euròpa
que correspond al domèni lingüistic contemporanèu de la lenga occitana.
Segon d'unes Occitània forma una nacion (e los occitans son un
pòble),
segon d'autres es solament un espaci lingüistic e cultural.
La mapa d'Occitània se religa dirèctament amb la definicion de la lenga e de la cultura occitanas.
Occitània ven del latin medieval Occitania. La primièra part del mot, Occ-, ven de l'occitan òc e de
l'expression lenga d'òc,
en italian lingua d'oc, un nom que
Dante donèt a l'occitan segon
lo sieu biais de dire de "òc" (per oposicion a la lenga de si qu'es l'italian
e a la lenga d'oïl qu'es lo francés). La terminason -itània es probable una imitacion del
vièlh nom [Aqu]itània.
Occitània es un espaci situat entre mar Granda (l'ocean Atlantic tanben apelat peugue
en gascon)
e mar Nòstra
(la mar Mediterranèa), dels Aups e del massís central als Pirenèus, en Euròpa occidentala.
Son clima es temperat. Sa populacion estimada es de 14 o 15 milions d'abitants.
Sa superfícia es d'aproximativament 190 000 o 200
000 km2. Lo gentilici es occitan -a.
La lenga que definís Occitània es l'occitan,
qu'es situacion minorizada
tant en França (la reconeissença
de las lengas regionalas dins la Constitucion
après la refòrma de
2008 càmbia pas res concrètament), qu'en Itàlia e dins la Val d'Aran, ont a pasmens l'estatut de lenga co-oficiala
(dempuèi
2006 aquela co-oficialetat es valedoira dins tota la Generalitat
de Catalonha).
A despart de
las lengas dels estats e de las regions (espanhòl e catalan, francés, italian e piemontés),
se parla tanben un fum de lengas d'immigracion economica o toristica. Gessa a pas cap d'estatut oficial çaquelà.
